LA UNION – Agtutuon a kaso ti sangsanguen ita ti maysa a retirado a soldado a nangpaltog iti tallo nga agkakabagian idiay Barangay Gumot, Rosario, La Union.
Nabigbig ti suspek a ni Reynante Galera, 49-anyos, sigud a miembro ti Philippine Army.
Iti pannakiuman ti Bombo Radyo ken ni PCI Bernabe Oribello, hepe ti pulisya iti nasao nga ili, sakbay ti krimen ket naginom da Galera ken ni Glenn Buyan, 27-anyos.
Ditoy a nagbinnara dagiti dua kalpasan a naukag ti isyu gapu iti panangpalsiit ni Buyan kadagiti taraken a manok ti soldado kasaruno ti panangpaltogna kenkuana iti shotgun.
Napuntaan iti bala iti naduma-duma a paset ti bagida da Glenn ken ti amana a ni Vicente Buyan, 52-anyos; ken ti kasinsinna a ni Christopher Montero, 42-anyos a nagbanag iti pannakatay ti naud-udi.
Ginandat pay ti suspek ti aglibas ngem nakemmeg dagiti otoridad idiay Barangay Udiao bayat nga agur-uray iti paglugananna a bus.
Kabayatanna, inaklon ni Galera a malaksid iti isyu ti panangdangran kadagiti manokna ket nasair pay ti riknana gapu iti iwarwaras a sayangguseng ti pamilya Buyan maipanggep iti panagbabai daytoy.
