LA UNION – Kimmambiyo ni retired police colonel ken sigud a PCSO general manager Royina Garma iti waragawag maibasar iti insumite na nga affidavit iti House Quad Committee.
Iti nasao nga affidavit, imbaga ni Garma nga impatungpal ni sigud a Presidente Rodrigo Duterte ti replica ti kampanya kontra droga idiay Davao, iti panangipatungpal ti nationwide campaign a war on drugs, a nagresulta iti extrajudicial killings iti sidong ti napalabas nga administrasyon.
Nasorpresa ti komite iti pangbaliktad ni Garma maibasar iti testimonya na, a nangparnuay ti baro nga insight seknan iti implementasyon ti Duterte administration iti kontrobersiyal a war on drugs partikular iti reward system para iti EJKs.
Iti nasao nga affidavit ni Garma, imbutaktak na ti sumagmamano a napapateg nga impormasyon a pakairam-ramanan ni Duterte ken sigud nga aide na nga itan ket ni Senator Bong Go.
Indetalye ni Garma iti panagtaripnong da kenni sigud a President Duterte idi 2016, nga idi ket agsap-sapol ti maysa nga opisyal a mangi-manehar iti war on drugs.
Kinuna ni Garma, nga in-rekomenda na ti upperclassman da iti PNPA a ni Police Colonel Edilberto Leonardo nga idi ket naka assign iti Criminal Investigation and Detection group (CIDG), nga ita ket naglosolos a NAPOLCOM chief.
Nabilin ni Leonardo a mangbukel ti specialized task force kalpasan a nakitaripnong kenni ex-PRRD.
Nangaramid met ti proposal ni Leonardo ket insumite na kenni Duterte, babaen kenni Sen. Go.
Saan a nagbayag, impatungpal ti binukel a team ni Leonardo iti plano ket ni Garma iti nagserbi a middleman.
Imbutaktak na pay iti reward system, a ti pondo ket maidal-dalan iti bank accounts ni Peter Parungo, maysa a sigud a detainee.
Segun kenni Garma, mismo a ni Leonardo ti agrep-report ti amin a mat-matay manipud iti police operations direkta kenni sigud nga Special Assistant to the President tapno mairaman iti weekly reports ken tapno masiguro a ma-refund dagiti operational expenses.
Imbaga ni Garma, a ni Leonardo ti mangdetermina nu siasino ti mairaman iti listaan dagiti drug personalities ken siasino ti maikkat iti listaan.
Kinumpirma pay ni Garma a nangngeg na pay ti saritaan seknan iti operasyon idiay Davao penal colony.
Kabayatanna, imbaga ni Garma a nakasagana pay a mangipaay ti testimonya iti quad comm seknan iti EJK nga adda pakainaiganna iti illegal drugs.
