BR LA UNION – Nagsublin iti operasyon na ti Heathrow Airport idiay London idi kalman, Sabado, Marso 22 kalpasan ti power outage gapu iti dakkel nga uram a timpuar iti kaabayna laeng a substation ti koryente a nangtaktak iti panagbiahe ti nasurok a 200,000 a pasahero.
Segun iti British Airways, 8 kadagiti naitantan a flights ket nagbiyahe met laeng iti Heathrow Airport idi rabii ti Biyernes.
Nupay segun iti UK flag carrier, manamnama nga ag-operate daytoy iti 85% laeng a kapasidad ken naipakaammo kadagiti pasahero a namnamaenda ti pannakaitantan ti flights iti sumaganad nga aldaw.
Inpakaammo met ti Air Canada ken United Airlines ti pannakaituloy ti scheduled flights nga agturong ken agsubli iti eropuerto ti Heathrow idi rabii ti Biernes.
Immuna ti daytoy, segun iti London Fire Brigade (LFB), timpuar ti uram iti maysa a transformer a naglaun iti 25,000 a litro ti cooling fluid.
Gapu iti dayta, nasurok nga 65,000 a babbalay iti lugar ti napukawan iti suplay ti koriente kasta met ti eropuerto.
Nangrugi metten ti imbestigasyon tapno duktalen ti makagapu iti uram, a nakasentro iti electrical distribution equipment.
Ti Heathrow airport ket pudno a kadakkelan nga aviation hub idiay United Kingdom a sadiay nasurok a 83.9 a milion a pasahero ti nairekord iti eropuerto idi napan a tawen.
