Irekomendarna ni Health Secretary Ted Herbosa kadagiti lokal a chief executives a maipariten kadagiti tattao, partikular dagiti ubbing, nga aglangoy iti danum ti layus gapu iti peggad a maakaran dagitoy iti leptospirosis.
Kinuna daytoy ni Herbosa iti umad-adu a kaso ti leptospirosis, kalpasan ti nakaro a layus iti sumagmamano a lugar gapu iti napigsa a tudo nga inyeg ni Bagyo Carina ken Southwest Monsoon.
Daytoy ti nangtignay iti Department of Health (DOH) a mangibilin iti pannakaaktibo ti surge capacity plan kadagiti ospital babaen ti panangimatonda iti National Capital Region.
Kinuna ni Herbosa a planona met ti makisarita ken ni Education Secretary Sonny Angara tapno rugianna nga edukaren dagiti ubbing a saanda a lumasat iti layus.
Ti leptospirosis ket bacterial infection a maiyak-akar babaen ti ayup a kas kadagiti rodents wenno bao.
Mabalin a malaokan ti isbo manipud kadagiti naimpektaran a bao iti danum ti layus bayat ti napigsa a tudo, ket ngarud mabalin a sumrek iti bagi dagiti tattao nga magna kadagiti layus.
Karaman kadagiti sintomas na ti gurigor, panagisbo, panagulaw, muscle pain, ken sakit ti ulo.
Ti incubation period ti leptospirosis ket manipud dua agingga iti 30 nga aldaw, a kadawyan a mangipakita kadagiti sintomas iti agarup maysa agingga iti dua a lawas kalpasan ti pannakaisarang kadagiti kontaminado a danum ti layus.
Inawagan ti DOH dagiti naglabas iti layus iti baet ti napigsa a tudo a dagus a makiuman iti healthcare professional uray no adda sintomas wenno awan.
Segun ken ni Herbosa, di kumurang nga uppat a tattao ti naipadamag a natay gapu iti leptospirosis.
Pinasingkedan ni DOH spokesperson Assistant Secretary Albert Domingo a dagitoy ket natay kalpasan ti Bagyo Carina.
