Ita nga 16 nga aldaw laengen sakbay Paskua, imbilin ni Philippine National Police (PNP) Chief General Rommel Francisco Marbil a paingeten pay ti kapulisan dagiti security operations tapno masiguro ti kinatalged ti publiko ken maliklikan ti aniaman a criminal activities dagiti mannibrong.
Segun kenni Marbil, kangrunaan a mandato ti pulisya ti panagpatalinaed ti peace and order bayat nga okupado ti kaaduan ti nagduduma a Christmas party ken last minute shopping.
Kinunana a nangipaulog isunan ti direktiba kadagiti amin a police units ti intero a pagilian a paingeten ti police visibility babaen ti regular a panagpatrolya ken panangideploy ti kanayunan a personnel kadagiti natao a lugar kas kadagiti malls, mercado, ken transport hubs.
Panggep daitoy ti madagdagos a panagresponde dagiti pulis apaman adda dagiti emergency.
Sakbay daitoy ket immunan nga inwaras ti PNP ti nasurok 14k a personnel da kadagiti nadumaduma a paset ti pagilian kasaruno ti “Ligtas Paskuhan 2024”.
