Pormalen a nangipatulod ti Notice to Respondent iti House Committee on Justice kenni Vice President Sara Duterte seknan dagiti dua a verified impeachment complaints kontra kenkuana.
Iti abiso a napetsaan ti Marso 4, 2026 ket naipatuloden sadiay Office of the Vice President idiay Mandaluyong City. Nabilin ni Duterte a mangisubmitir ti verified answer na ti las-ud ti 10 nga aldaw a saanen a mabalin pay a mapawaywayan kas maiyannurot ti House rules iti impeachment proceedings.
Segun iti komite nga idadauloan ni Rep. Gerville “Jinky Bitrics” Luistro, nakitaanen kas “sufficient in substance” dagiti impeachment complaint nga impila da Joel Saballa ken Atty. Nathaniel G. Cabrera.
Pinakdaaran ti komite a nu saan a nakaisubmitir ni VP Sara ti nakatuding nga aldaw ket maibilangen daitoy kas panagtalikod ti karbengan a sumungbat ken naan-anay a panaglibak kadagiti amin nga alegasyon.
Naawat ti Office of the Vice President ti nasao nga abiso ti alas-10:44 iti bigat ita nga aldaw ti Huebes, Marso 5, 2026.
Segun iti allagaden ti Kamara, kasapulan a makaisubmitir pay ti verified answer ti respondent sakbay nga agtuloy ti komite para ti umuna a paset ti deliberasyon kadagiti reklamo. | via Bombo Rafael Galano
