Inaprobaran ti House appropriations committee idi Martes ti mosion a mangipaulog iti subpoena kadagiti audit report ti Commission on Audit iti pannakausar ti confidential funds ti Office of the Vice President (OVP) ken Department of Education (DepEd) bayat ti fiscal year 2022 agingga iti 2023.
Ni ACT Teachers party-list Representative France Castro ti immuna a nangitag-ay iti mosion kalpasan a pinasingkedan ti COA a nalpasen dagiti audit actions ken obserbasionna kadagiti liquidation reports nga insubmitir ti OVP ken DepEd, agpada nga indauluan ni Vice President Sara Duterte, kabayatan ti fiscal period.
Kinuna ti state auditor a naipatulod ti kopia dagiti report iti Office of the President, Senate President, ken House Speaker.
Sinuportaran met da Representative Arlene Brosas ken Raoul Manuel ti mosion.
Iti 2022 Annual Audit Report, impalgak dagiti state auditors nga adda P125 milion a confidential expenses ti OVP idi napan a tawen nupay awan ti appropriation para iti intelligence wenno confidential funds iti sidong ti 2022 General Appropriations Act.
Nakaawat pay ti OVP iti P500 million a confidential funds idi 2023.
Kabayatanna, insingasing ti COA ti P13.41 bilion a budget para iti 2025 babaen ti National Expenditure Program, 5% a nababbaba ngem iti orihinal a P14.08 billion.
Iti nasao a bilang, P754.44 milion ti nailatang para iti MOOE, P111.76 milion para iti capital outlay, ken P11.50 bilion para iti personnel services.
Ti COA ket addaan iti utilization rate a 52.11% agingga ita a tawen.
