BR LA UNION – Pinagkedkedan ti International Criminal Court (ICC) iti kiddaw ti kampo ni sigud a Presidente Rodrigo Duterte a makagun-od ti pribado a komunikasyon iti nagbaetan ti registry ti korte ken dagiti independent medical experts a nangtingiting ti kabaelanna a sumango iti panagusig.
Iti desisyon a napetsaan ti Disyembre 23, 2025, kinuna ti ICC Pre-Trial Chamber I a napaay ti depensa a paneknekan iti kasapulan a dagus a pannakaipablaak dagiti email, surat, ken listaan ti saritaan iti nagbaetan ti Registry ken ti medical panel.
Segun iti korte, ti Registry ket maysa a “neutral organ” a mangibabaet dagiti instruksiyon kadagiti eksperto.
Innayon ti International Criminal Court nga iggem ti depensa iti amin nga impormasyon a kasapolan da, agraman dagiti dokumento a naipatulod iti panel.
Imbaga pay dagiti hurado a dagiti report dagiti eksperto, a naipatulod idi Disyembre 5, 2025, ket nalawag nga imbagada dagiti materyales ken pagannurotan a nausar iti panagamiris.
Immuna a naibilin ti medical examination kalpasan a kimmiddaw ti kampo ni Duterte ti indefinite adjournment iti hearing.
Nagpanawagan met ti Office of the Prosecutor a maituloy ti proseso, ken imbaga da nga agpam-pambar laeng ni Duterte nga addaan ti cognitive impairments—banag a pinaglibakan ti depensa.
Iti agdama, nakabalud ni Duterte iti ICC detention center idiay The Hague ken sumangsango iti kaso a crimes against humanity mainaig iti extra-judicial killings iti labanna kontra droga.
