LA UNION – Impasa ti South Korea’s parliament iti mosyon a ma-impeach ni President Yoon Suk Yeol, gapu iti apagbiit a panangideklara ti martial law idi Disyembre 3.
Impasa ti National Assembly ti mosyon babaen iti botos a 204-85.
Gaputi dayta, suspendido itan ti presidential power ni Yoon, agingga nga ituding ti Constitutional Court nu ma-dismiss kas presidente wenno maisubli ti bileg na.
Kasaruno ti pannaka-aprubar iti impeachment, ni Prime Minister Han Duck-soo, a maikadwa a kangatuan nga opisyal idiay South Korea, iti temporaryo nga agtakem a lider ti nasao a pagilian.
Nu maikkat iti puwesto ni Yoon, maisayangkat ti national election iti uneg ti 60 nga aldaw, tapno ibotos ken ipatugaw iti sumukat a presidente.
Maipalagip a saan a naipasa ti immuna nga impeachment motion idi Disyembre 7 kontra kenni Yoon kalpasan nga im-boycott ti ruling party lawmakers.
Iti maikadwa a gandat a panang-impeach kenni Yoon, nakipaset iti 12 a miyembro ti partido ni Yoon a People Power Party (PPP) iti opposition parties nga akin-kontrol ti 192 seats manipud iti 300-member national assembly, a nangipaay ti two-thirds threshold a kasapolan.
Ni Yoon iti maikadwa a conservative president a na-impeach idiay South Korea.
Immuna ni Park Geun-hye a naikkat iti puwesto idi 2017.
Kabayatanna, nu mapaneknekan a maysa a kita ti rebellion iti indeklara na a martial law idi December 3, posible a sumango ni Yoon iti death penalty.
