Inawagan ti Department of Budget and Management (DBM) idi Huebes dagiti presidente ti ahensia ti gobierno nga ipangpangrunada dagiti contract of service (COS) ken job order (JO) workers iti panangpunnoda iti bukodda a bakante a plantilla wenno permanente a posision iti gobierno.
Kinuna ni Budget Secretary Amenah Pangandaman a manipud iti dagup a 2,017,380 a plantilla positions iti national government, 92% ti napunno idinto nga adda pay ti nabatbati nga 8% wenno pakaibatugan ti 168,719 positions.
Dinakamat pay ti Budget Chief ti pannakairuar ti Commission on Audit (COA)-DBM Joint Circular No. 2, series of 2024, a mangipaay iti pannakapaatiddog ti transition period iti pannakipaset dagiti COS ken JO workers ti gobierno.
Ipaay ti sirkular a dagiti departamento wenno ahensia ket mabalinda nga ikkan ti serbisio dagiti baro a trabahador ti COS/JO babaen kadagiti individual contracts kasta met nga i-renew dagiti agdama a trabahadorda iti COS/JO agingga iti Disiembre 31, 2025.
Maitunos iti pannakairuar ti nasao a sirkular ti direktiba ni Presidente Ferdinand Marcos Jr. a mangpalawa iti transition period iti pannakaikameng dagiti trabahador ti COS ken JO iti gobierno nga agleppas ti kontratadan inton Disiembre ita nga tawen.
Segun iti DBM, immun-unan nga imbilin ni Presidente Marcos kadagiti ahensia ti gobierno ti panangipatungpalda kadagiti estratehia a tumulong kadagiti trabahador ti COS ken JO a kualipikado iti permanente a posision.
Karaman kadagiti estratehia a maikonsiderar ket ti panangipatungpal kadagiti programa, kas iti review sessions, tapno matulongan dagiti bukodda a COS ken JO workers a makapasa iti Civil Service Examination.
Mainayon pay a mabalin a maparang-ay dagiti skills ken kapabilidad dagiti COS ken JO workers babaen ti panangisuro ken trainings kadakuada, iti kasta ket makapasa da iti Civil Service Examination.
Contract of Service Workers iti awag kadagiti serbisyo ti indibidual, pribado man a kompania, sabali nga ahensia ti gobierno, non-governmental agency, international organizations, learning service provider, wenno technical experts a mangaramid iti espesial a proyekto wenno trabaho iti uneg laeng ti espesipiko a panawen.
Kabayatanna, dagiti Job Orders met ket kas kadagiti piece work wenno ‘pakyaw’, wenno intermittent, emergency jobs a maaramid iti ababa laeng a las-ud iti panawen para iti espesipiko a trabaho.
