LA UNION – Isagsagana itan ti pulisya ti kaso a pammapatay kontra iti maysa a mister a nakapatay iti kamalala ti misisna idiay Barangay Delles iti ili ti Burgos, La Union.
Nabigbig ti 48-anyos a suspek a ni Tirso Dulnuan bayat a ti biktima ket ni Ryan Banayat, agpada nga residente iti nasao a lugar.
Iti pannakiuman ti Bombo Radyo iti suspek, kinunana a sakbay ti napasamak a pannagbat iti biktima ket naggapu daytoy iti taltalon ken nagawid iti balayda tapno aginana.
Ngem idi lumabas ni Dulnuan iti kaarrubana a pagnanaedan a mismo ni Banayat ket nangngegna nga adda agar-arasaas ken uni ti babai.
Gapu iti daytoy ket nagatap ti suspek agsipudta adda iti ballasiw-taaw iti asawa ti biktima ken iti laeng nabati iti agkakaarruba idi nagturong daytoy iti taltalon ket dagiti dua.
Idi lukatan ti mister ti ruangan ti balay ni Banayat ket kellaat a nagsipnget ti panagkitana kalpasan a naimatanganna a nakaparabaw pay ti misis na iti kamalala na a lalaki.
Babaen iti maysa a buneng ket tinagbat ti suspek ti maipagarop a karelasyon ti misisna ngem naaramid pay ti biktima ti makaadayo manipud iti nasao nga balay uray no nasugatanen ken awanan iti pagan-anay.
Saan nga ininggaan ni Dunuan a kamaten ken tinagtagbat iti biktima.
Pimmusay met laeng ni Banayat kabayatan iti panangiturong iti ospital dagiti residente sadiay.
Nupay agbabawi ti suspek iti inaramidna a pammapatay iti kaarruba na, impaganetgetna a saannan a maisubli ti sigud a relasyonda ti misis daytoy gapu iti pananggulib daytoy.
Kabayatan na, nasakit iti nakem dagiti kakabagyan ti biktima gapu iti nakaam-ames a pannakatay daytoy.
Saan a mamati dagitoy iti ibagbaga ti suspek nga adda maipawil a relasyon wenno makinanaeg ni Banayat iti nasao a misis.
Inkagumaan met ti Bombo Radyo News Team nga alaen ti salaysay ti misis ngem awan daytoy iti balayda.
