Napagtulaganen ti Kamara a ti pannakaitantan ti umuna a Bangsamoro Autonomous Region in Muslim Mindanao (BARMM) elections ket maangay laeng iti lima a bulan ken maisayangkat inton Oktubre 13, 2025.
Daytoy ket kalpasan nga immanamong ti dua a pagpandayan-linteg ti Kongreso iti naangay a Bicameral Conference Committee meeting.
Maipalagip a nagduma ti bersion ti Senado ken Kamara ti BARMM elections postponement bill gapu ta lima a bulan ti inaprobaran ti Senado bayat a maysa ti tawen ti bersion ti Kamara.
Para kenni Escudero, atiddog unay ti maysa tawen a pannakaitantan ti eleksion sadiay BARMM gapu ta adda met umdas a tiempo ti Kongreso a mangi-reset iti eleksion.
Kinunana a nasaysayaat ti ababa a pannakaitantanna no maituloy ti eleksion ti BARMM inton bulan ti Oktubre.
Kabayatanna, manamnama a marepaso ita nga aldaw ti bill a nairanta a mangitantan iti BARMM elections.
