Nakasaganan ti kampo dagiti biktima ti drug war a harangen ti posible a petisyon ti defense panel ni sigud a presidente Rodrigo Duterte para ti interim release idiay International Criminal Court (ICC).
Ti interim release ket temporario a pannakawayawaya ti naakusaran nga indibidwal bayat a nakabinbin paylaeng ti pannakadengngeg ti kaso kas maiyannurot ti sumagmamano a kondisyon nga intuding ti korte.
Segun ti maysa kadagiti abogado iti drug war victims a ni Atty. Gilbert Andres, nakasagana da a mangipaay ti pakaseknan tapno kiddwaen iti korte nga ibasura ti petisyon aapaman nga mangisubmitir tu aplikasyon para ti interim release ti kampo ti sigud a presidente.
Sinegundahan met daitoy ni ICC assistant to counsel Atty. Kristina Conti ken kinunana a kontraen da ti nasao nga addang agsipud ta maisupadi daitoy iti interes dagiti biktima.
Sungbat daitoy ti kampo dagiti biktima ti gubat kontra droga kasaruno ti kinuna ni defense lead counsel Nicholas Kaufman a plano da ti mangipila ti petisyon para iti interim release ni Duterte.
Nakatuding ti sumaruno a panagsango ni FPRRD iti international tribunal sadiay The Hague, Netherlands inton Setyembre 23 para iti kumpirmasyon kadagiti kaso a maibatbato kontra kenkuana ken iti administrasyon na.
