BR LA UNION – Kampante ni Bicol Saro Partylist Rep. Terry Ridon a saan a maka-apekto iti impeachment proceedings ti panangidatag ni Atty. Manases Carpio ti kaso idiay Quezon City Prosecutor’s Office.
Segun kenni Ridon, agtultuloy ti proceedings, kas iti naudi a pannakadengngeg ti House Justice Committee a naituding inton Abril 29, iti laksid dagiti adu a kaso a naipila kas iti panaglabsing iti Anti-Money Laundering Act (AMLA), Bank Secrecy Law, ken Data Privacy Act.
Bimuwelta pay ni Ridon iti kampo da Carpio ken VP Sara Duterte, a kinunana a ti panangipila iti darum ket saan a makailemmeng ti naibutaktak a pinansial nga aktibidad iti account dagiti agassawa.
KInapudnona kunana, kaiyarigan nga inaklon ni Carpio nga adda ti ‘factual basis’ dagiti record nga inruar ti Anti-Money Laundering Council.
Kaiyarigan nga aminado kunana iti kampo ti agassawa nga adda napasamak a P6.77 billion a balor ti transaction.
Segun kenni Ridon, saan a pinaglibakan dagiti kaso ti nairuar a record, ken ti ‘accuracy’ dagitoy kas ti sumagmamano a bilyon gatad iti bank transaction.
Takderan ni Ridon, nga agserserbi kas chairman ti House Committee on Public Accounts, a saan nga ipaw-pawil ti AMLA, Bank Secrecy Law, ken Data Privacy Act iti panangirwar ti nasao a record, maisupadi iti basaran ti kaso nga indatag ni Carpio.
