LA UNION – Agtultuloy a maag-agasan iti ospital ti maysa a lalaki kalpasan a binagsol ti bukodna a kasinsin gapu laeng ta naagawan iti kantaenna a samiweng iti videoke.
Nabigbig ti biktima a ni Jayson Oler, 21-anyos, mannalon bayat a ti suspek ket ni Emil John Oler, agpada a residente ti Barangay Pa-o idiay ili ti Balaoan.
Maibasar iti imbestigasion dagiti otoridad, naamuan a naginnawis nga aginom dagiti agkakasinsin ngem idi apag-isu nga agkanta koman iti videoke ni Emil John ket inagaw ti maysa pay a kaduada ti mikropono kasaruno ti panagkantanan iti samiweng nga insagana ti suspek.
Gapu iti pannakasair ti riknana ken epekto ti kinabartek ket kellaat a nangasot ni Emil John iti patadem kasaruno ti panangbagsolna iti namitlo a daras iti bukot ti kasinsinna.
Dagus met a naitaray iti pagagasan ti biktima bayat a nagdisnudo a simmuko kadagiti otoridad ti suspek.
Agtultuloy ita nga im-imbestigaran dagiti otoridad ti insidente.
