Nangited ni Department of Interior and Local Government (DILG) Secretary Jonvic Remulla ti deadline nga Enero 10 kadagiti local government units (LGUs) a mangisubmitir iti maudi a reportda maipapan iti panagsukimat iti offshore gaming operations a masakopan da.
Daytoy ti linaon ti Memorandum Circular 2025-001 a naipaulog kadagiti amin a gobernador, mayor, barangay heads ken DILG regional directors.
Innayonna a nasken a masigurado a saan a mapabaro ti amin a business permit ken lisensia dagiti POGO ken amin a lisensia ti internet gaming.
Pinaregtana pay dagiti LGU nga agreport iti polis no adda pay laeng dagiti POGO nga agop-oprate kalpasan ti pannakaipatungpal ti Executive Order 74 wenno naan-anay a pannakaiparit da ditoy pagilian.
Maipalagip nga inwaragawag ni Presidente Ferdinand Marcos Junior iti maikatlo a State of the Nation Address (SONA) na idi Hulio ti permanente a pannakaiparit ti POGO.
