Sinuspindiren ti Land Transportation Office (LTO) ti lisensya ti driver a karaman ti nakaam-ames nga aksidente sadiay Ninoy Aquino International Airport (NAIA) ita a bigat ti Dominggo. Imbilin payen ti Department of Transportation (DOTr) a maipasidong ti drug testing ti driver ti SUV nga saan a naigagara a maararo dagiti tao ti departure area ti Terminal 1 ti airport.
Segun iti LTO, ti lisensya ti driver ket temporario a nasuspindir ti 90 nga aldaw kabayatan ti imbestigasyon iti insidente.
Maibasar ti Anti-Drunk and Drugged Driving Act of 2013, obligado dagiti drivers a mairaman ti aksidente iti pannakaipasidong ti chemical testing, karaman ti drug screening. Nu agkedked da ket mabalin a ma-revoke dagiti lisensya da ken agmulta da pay.
Dua a tattao ti natay gapo iti aksidente — maysa a 28-anyos a lalaki ken 5-anyos nga ubing bayat a tallo a sabali pay ti nadundunor.
Nangiruar metten ti LTO iti show-cause order kontra iti rehistrado nga akinkukua ti lugan. Nabilin ti driver nga isurrender ti lisensya na ti madagdagos a panawen.
