BR LA UNION – Kumpiyansa iti Malakanyang a respetuen ti Amerika iti “sovereign prerogative” ti Pilipinas seknan iti panangiggem na iti panang-aresto kenni sigud a president Rodrigo Duterte gaputi warrant of arrest nga inruar ti International Criminal Court (ICC).
Waragawag daytoy ni Palace Press Officer USec. Claire Castro kasaruno ti nagbalin a panawagan ni Senator Bato Dela Rosa kenni US President Donald Trump nga i-sanction dagiti indibidwal a timmulong iti pannakaiturn-over ni ex-PRRD iti ICC.
Impaganetget ni Dela Rosa iti napirmaan nga Executive Order ni Trump idi Pebrero a mangipaay iti otorisasyon ti economic ken travel sanctions kontra kadagiti indibidwal nga agtrabtrabaho iti ICC ken mangisay-sayangkat ti imbestigasyon kadagiti US Citizens ken kadagiti kaalyado a pagilian kas ti Israel.
Nakailanad iti nasao nga EO ni Trump a mabalin a pagkedkedan ti US ken dagiti kaalyado na a pagilian iti anyaman nga aksiyon ti ICC.
Impaganetget pay ni Castro a nupay karaman ti Pilipinas kadagiti kaalyado a pagilian ti US, mamati daytoy a bigbigen ti Amerika iti prerogative ti pagilian.
