Mapatta-patta a 7,000 a tattao iti nagtitipon iti aglawlaw ti People Power Monument iti Epifanio de los Santos Avenue (EDSA) ken White Plains Avenue ita nga aldaw, Hunyo 30, a nakaigapuan ti temporario a pannakaserra ti sumagmamano a kalsada malaksid iti northbound lane, ken nabuntog a taray ti trapiko.
Segun kenni Quezon City Police District (QCPD) spokesperson Maj. Jennifer Gannaban, dumanon ti nasurok-kumurang 7,000 a bilang dagiti nakipaset.
Ado kadagiti dimmar-ay iti nakasuot ti bado nga adda pakainaigan na kadagiti immunan a nalawa a panagtitipon ti Iglesia ni Cristo (INC), karaman iti National Rally for Peace idi Enero 2025 ken Rally for Transparency and Accountability idi Nobiembre 2025. Nupay kasta awan ti opisial a waragawag dagiti otoridad a maikonektar iti nasao a kawes iti mismo a panggep wenno iti organizer.
Immunan nga inpadamag ti Metropolitan Manila Development Authority (MMDA) a nangrugi nga agdupodop dagiti nakipaset agarop alas-tres ti parbangon, rason tapno ipatungpal iti traffic rerouting ken dadduma pay a traffic management measures iti aglawlaw ti People Power Monument. Binalakadan ti MMDA dagiti motorista nga agusar dagiti alternatibo a ruta bayat nga agtultuloy iti panagtitipon.
Agtultuloy met a banbantayan ti QCPD ken MMDA iti sitwasion tapno mapagtalinaed iti urnos ken masigurado iti nasayaat a garaw ti trapiko kadagiti apektardo a lugar.
