LA UNION – Agtultuloy ti isaysayangkat nga imbestigasyon iti BFP Bauang iti nauram a pagtaengan agarup alas-6:55 ti agsapa idi kalman, June 27, idiay Brgy. Payocpoc Sur, Bauang, La Union.
Daytoy ket kukua ti managan Marilyn Rimando.
Iti pannakiuman ti Bombo Radyo La Union kenni SFO2 Elvis Gagtan ti Bauang Fire Station, kinunana nga immabot iti 2nd alarm ti napasamak nga uram.
Timmulong iti Bauang BFP a nagresponde iti fire truck manipud Caba Fire Station.
Nagpaut ti maysa nga oras ken 43 minuto iti panangsebseb dagiti bombero agingga a naideklara ti fire out alas 8:43 ti agsapa.
Iti inisyal nga imbestigasyon dagiti otoridad, timpuar ti uram iti masters bedroom iti daya a paset ti pagtaengan, gaputi posible a short circuit wenno nabaybay-an a saksakan ti electric fan.
Dagus a nagramaram ti apoy iti bobida iti pagtaengan.
Segun kenni Gagtan ket dandani dimmapo amin nga alikamen dagiti bumalay ken bassit laeng dagiti naisalbar da nga alikamen.
Naamwan a nagturong iti baybay dagiti bumalay ngem adda iti maysa a nabati nga isu iti nakadlaw ti apoy.
Iti agdama, agtultuloy pay laeng ti panangduktal dagiti otoridad iti pakabuklan a balor dagiti nauram nga alikamen.
