LA UNION -Kinedngan ti korte idiay Tagum, Davao del Norte ti dusa a pannakaibalud ni ACT Teachers party-list Rep. France Castro ken sigud a Bayan Muna party-list Rep. Satur Ocampo.
Innem a tawen a pannakaibalud iti naipataw kada Castro ken Ocampo, gaputi panangi-kabil da iti peligro ti biag dagiti menor de edad idi Nobyembre 2018.
Iti 25-a-pinanid a desisyon, imbaga ti Tagum Regional Trial Court Branch 2 a guilty da Castro, Ocampo, ken 11 pay a dadduma iti panaglabsing ti Section 10(a) ti Republic Act 7610 wenno Special Protection of Children Against Abuse, Exploitation, and Discrimination Act nga addaan kaibatugan nga uppat agingga innem a tawen a pannakaibalud .
Binilin pay ti pagukuman dagiti akusado nga agbayad ti P10,000 kas civil indemnity ken P10,000 a moral damages ti tunggal menor de edad ken interes a 6% kada tawen sipud nagbalin a pinal ti desisyon agingga a mabayadan amin.
Kabayatanna, inabsuwelto ti Korte da Pastor Edgar Ugal, Rev. Ryan Magpayo, Eller Ordeniza, ken Rev. Jurie Jaime gaputi pannakapaay ti prosekusyon a paneknekan iti inaramid dagitoy a panagbiddut.
Dagus met nga immalma iti kampo ni Castro iti nagbalin a pagngedeng ti pagukukuman.
