LA UNION – Nakemmegen dagiti otoridad iti naisayangkat a hot pursuit operation dagiti suspek a nangpaltog ken nangpatay iti maysa a farm caretaker idiay Barangay Ballogo, Bacnotan, La Union.
Iti eksklusibo nga interview ti Bombo Radyo La Union kenni PMajor Gerardo Macaraeg Jr. , hepe ti San Juan Police Station, kinuna na a maysa enlisted personnel ti Phil. Marines ken maysa nga AWOL PNP-SAF dagiti dua a suspek.
Nabigbig dagitoy nga isuda Sgt. Allan Alegria alyas Major Allan Rashid Ortega, 44, tubo ti Aborlan, Palawan ken Patrolman Rogie Ege, 28, tubo ti Negros Occidental.
Segun kenni Macaraeg a sakbay a nakemmeg dagiti suspek ket naki-kinnamat da kadagitoy manipud idiay ili ti San Juan gaputa ginandat da ti aglibas.
Nakorner dagiti suspek a nakalugan iti orange pick-up, babaen iti checkpoint dagiti otoridad iti Barangay Lingsat ditoy syudad ti San Fernando.
Nakemmeg pay iti maysa a kadwa da iti pagdag-dagusan dagitoy.
Nakatulong ti CCTV tracking iti pannakatunton iti lokasyon ken naglemmengan dagiti suspek, manipud iti nagdagusan da a hotel.
Nakumpiskar pay dagiti otoridad manipud kadagiti suspek iti sumagmamano a high powered firearms, bala, bullet vests, radios, cellphone, back pack, ken dadduma pay.
Kinuna ni Macaraeg a base iti imbestigasyon, nasurok maysa a bulan nga addan ditoy La Union dagiti suspek tapno sapolen ti target person.
Imbutaktak na pay nga elite trained dagiti suspek ken adda pakaibilbilangan da a grupo.
Kinuna na nga addan iti na-establisar a motibo iti krimen ngem nagkedked pay laeng a mangibutaktak.
Maipalagip a pinaltugan dagiti suspek iti ulo ti biktima a ni Cristito Morate, 49, tubo ti Imus, Cavite a puon ti dagus a nakatayan daytoy, kabayatan ti panagbantay na iti maysa a farm a pagtar-taraknan ti papalluten a manok idiay Barangay Ballogo, Bacnotan.
Naidatag metten ti kaso a murder kontra kadagiti suspek ken RA 10591 kalpasan a matiliwan dagitoy iti naduma-duma a klase ti armas ken bala.
Agtultuloy iti imbestigasyon dagiti otoridad tapno duktalen nu siasino ti mastermind iti krimen ken pudno a motibo.
Kabayatanna, iti inusar a behikulo dagiti suspek ket nakarehistro iti maysa a taga-Dagupan City Pangasinan.
