BR LA UNION – Tallo a trabahador ti nakaru a nasugatan kalpasan ti panagbettak iti uneg ti gun factory Idiay Barangay Fortune, Marikina itay malem ti Lunes.
Maibasar iti report, naputdan ti dua nga ima iti maysa kadagiti biktima, idinto a nasugatan ti barukong ken mata ti dua pay.
Dagus a naitaray dagitoy idiay Amang Rodriguez Medical Center.
Maibasar iti inisyal nga imbestigasyon ti Marikina City Police, bimtak ti maysa a karton a naglaun ti primer — iti paset ti bala nga agserbi a pangrugian ti panagbettak ti pulbura — bayat nga iggem ti maysa kadagiti trabahador.
Naamwan pay a ti biktima a naputed ti imana ket iggemna met ti primer box idi bimtak daytoy.
Maipalagip nga idi Pebrero napalabas a tawen, napasamak met ti panagbettak iti pagidul-dulinan ti gun powder iti isu met laeng a pabrika, a nakaigapuan ti uram.
Saan pay a nangiruar ti management ti gun factory iti statement mainaig iti kaudian nga insidente.
Kabayatanna, ikonsiderar ti lokal a gobierno ti Marikina ti panangipila iti kaso kontra iti management ti paktorya gapu iti posible a kinaliway wenno panagbaybay-a.
