BR LA UNION – Mangnamnama iti nagannak ti estudyante a napapatay idi July 2024 a magun-od da ti hustisiya iti kabiitan a panawen, kalpasan a nakemmeg dagiti otoridad ti maysa kadagiti uppat a suspek, idiay Brgy. Imelda, Naguilian, La Union.
Iti akusado ket inarestar dagiti kameng ti Bacnotan Police Station iti pagtaengan da idi Biyernes, maiyannurot iti arrest warrant, nga inyisyu ti Regional Trial Court, Branch 66, ti San Fernando City, La Union.
Iti suspek ket 20-anyos, residente ti nasao a lugar.
Maibasar iti report ti pulisiya, naarestar ti suspek gaputi maipagarop a pannakairamanna iti brutal a pannakapapatay iti 21-anyos nga engineering student a ni Mark Dave Galario Valdez, residente ti Brgy. Alipangpang, Pozorrubio, Pangasinan, a ti bangkay na ket nasarakan a nauram ken nagpasar ti dunor.
Nasarakan daytoy ti maysa a driver iti karuotan a paset iti Bacnotan-Balaoan Provincial Road idiay Brgy. Quirino, Bacnotan, La Union idi July 2, 2024.
Iti agdama, nainget ti ipatpatungpal a manhunt operation dagiti otoridad kadagiti tallo pay a suspek.
