Naarestar ti maysa kadagiti high-ranking leader ti Cordillera People’s Democratic Front (CPDF) a ni Simeon “Filiw” Naogsan, agtawen iti 70, married, agnanaed idiay Barangay Tonglayan, Natonin, Mountain Province, Barangay 1, Santa Rita, probinsia ti Ilocos Norte.
Iti agdama, makipagtrabtrabaho ti Intelligence Unit kadagiti nadumaduma nga ahensia tapno maammuanda ti rason ti kaadda ni Naogsan iti nasao nga probinsia.
Impakaammo metten ni Police Major Jephree Taccad, Chief Provincial Operations Management Unit ti Ilocos Norte Police Provincial Office (INPPO), nga adda 15 nga arrest warrant a sangsanguen ni Naogsan, 14 kadagitoy ket manipud Mountain Province ken ti sabali ket idiay Ilocos Sur.
Maibasar iti inisial nga impormasyon, awan pay ti natiliw a kakadua ni Naogsan ngem kayatda a maammuan no siasino dagiti posible a kakunsabo na idiay Ilocos Norte.
Kinuna ni Police Major Taccad, agserserbi met ti natiliw a kameng ti leftist group a ni Naogsan kas communist terrorist leader ti Ilocos – Cordillera Region ken addaan iti pito a kaso ti murder, maysa ket manipud Ilocos Sur ken ti sabali ket manipud Mountain Province.
Mainaig iti daytoy, saanda pay a maipalgak ti agdama nga ayan ni Naogsan para iti bukodna a kinatalged gapu kadagiti nadadagsen a kaso a sangsanguenna.
Kabayatanna, nagpa-physical ken medical examination metten ni Naogsan bayat a naangay iti mugshot ken documentation na idiay Bacarra Municipal Police Station tapno maiturn-over iti court of origin.
