BR LA UNION – Agtultuloy a makomikom iti Municipal Environment and Natural Resources wenno MENRO-Bauang iti panangisayangkat ti clearing operations kadagiti nasulinek a lugar ti ili a Bauang, tapno mawaknitan dagiti kalsada manipud kadagiti natumba a kay-kayo idi dimmuprak ti bagyo emong.
Segun kenni Faith Corpuz, Admin Aide I ti MENRO Bauang, kadwa da iti Engineering Office Bauang ket nagturong da idiay Barangay Upper San Agustin, tapno isayangkat ti clearing operation, tapno saan a madisgrasya dagiti bumarangay ken motorista nga agdal-dalyasat iti nasao a lugar.
Malaksid dayta, maikadwa itan a lawas sipud dimmuprak ti bagyo emong, a mangisay-sayangkat da ti coastal clean-up tapno madalusan iti igid ti kabaybayan.
Iyaw-awis ni Corpuz iti pannakipaset dagiti residente iti naduma-duma nga aktibidad ti opisina da, a pakaibilangan pay ti tree planting, tapno lalo a mapasayaat ken mapadur-as ti implementasyon dagiti programa.
