LA UNION – Gapu iti nalaus a rurod ken imon a gapuanan ti isyu ti pananggulib, maysa a misis ti naospital kalpasan a binagbagsol ti asawana idiay ili ti Bangar, La Union.
Ti suspek ket agtawen iti 35 bayat a ti misisna ket agtawen iti 23, agindeg dagitoy idiay Butubot Norte, Balaoan.
Sakbay ti insidente, naamuan a nagturong ti suspek iti balay ti kabsatna idiay Brgy. Paratong 3 ili ti Bangar ket simmaruno a simmangpet ni misisna idi nadlawda nga adda ti umar-arubayan a lalaki.
Sinaludsod met ni mister ti lalaki ket nagpabigbig daytoy iti nagan a “Moises” a maipagarup a kabsat ni misis banag nga impakammona met iti biktima.
Nupay kasta, bayat ti pannakipatang ti suspek iti nasao a lalaki ket ditana a nasinunuo a ni gayam “Moises” ti agdinamag a karelasion ti asawana a taga-San Pablo, Balaoan.
Nagdardaras met daytoy a nangala iti screwdriver iti tricycle-na ngem nakatarayen ti lalaki isu nga imbaw-ingna ti pungtotna iti misis daytoy a naglak-am iti tama ti pammagsol iti abaga, tian ken luppona.
Dagus a naitaray ni misis iti ospital bayat a ti suspek ket insuko ti barangay kapitan kadagiti otoridad nga agtultuloy ita a maim-imbestigaran.
