LA UNION – Nainget a pinaglibakan iti maysa a 42-anyos a mister a kukua na dagiti nakumpiskar a droga iti uneg ti pagtaengan daytoy idiay Barangay Sagayad, San Fernando City, La Union.
Iti interview ti Bombo Radyo La Union iti suspek a managan Allan Reyes Pajimola, drug surrenderee, kinuna na a nu kukua na dagiti nakumpiskar a droga ket saan na nga idisso laeng iti abay ti telebisyon da.
Immuna ti daytoy, sinukimat dagiti otoridad iti pagtaengan ti suspek babaen iti bileg ti search warrant nga impaulog ni Judge Imelda Cosalan ti MTCC Branch 1, San Fernando City, La Union.
Resulta iti nasao nga operasyon, nakakumpiskar dagiti otoridad iti uppat a plastic sachet iti maipagarop a shabu ken naduma-duma a drug paraphernalia.
Kaso a panaglabsing iti R.A. 9165 iti sangsangwen ita nga asunto ti suspek.
