LA UNION – Agtultuloy iti isaysayangkat nga imbestigasyon dagiti otoridad idiay Luna, La Union seknan iti napasamak a pammaltog a nakatayan ti 63-anyos a money lender idiay Brgy. Cantoria No. 2 iti nasao nga ili agarup alas-12:45 idi malem kalman.
Binigbig dagiti otoridad ti biktima a ni Eliseo Pera, mannalon ken money lender ken residente ti Brgy. Napaset, Balaoan, La Union.
Iti eksklusibo nga interview ti Bombo Radyo La Union kenni Police Major Arnold Ongachen, officer in charge iti Luna Police Station, kinunana a kit-kitaen da ita iti cctv footages a posible a nakaala iti nagdalanan dagiti suspek sakbay ken idi nalpas ti krimen.
Base iti inisyal nga imbestigasyon dagiti otoridad, manmanehuen ti biktima ti motorsiklo daytoy bayat a dumaldalyasat iti nadakamat a kalsada idi tambangan iti maipagarop a riding in tandem suspects.
Nagsagrap iti 4 a tama ti bala ti paltog a Caliber 45 iti naduma duma a paset ti bagi ti biktima bayat a narekobre met iti SOCO iti 5 nga empty shell ti nakadamat a paltog.
Maysa nga ikonkonsidera dagiti otoridad a posible a motibo iti krimen ket robbery agsipudta mapukpukaw iti clutch bag ti biktima a naglaon iti nasingir na a kuwarta ken nginginaen a kuwintas a suot daytoy idi napasamak ti krimen.
Target ti Luna Police Station a ti kabiitan a panawen ket masolbar iti nadakamat a kaso.
