BR LA UNION – Naurnos ken natalna ti naisayangkat a White Ribbon March, a dinar-ayan iti rinibu a miyembro manipud iti nadumaduma a religious, progressive, ken civil society groups.
Kalpasan ti nasantoan a misa nga indauluan ni Bishop Jose Colin Bagaforo iti EDSA Shrine, nangrugi ti martsa iti agarup ala 1:30 ti malem a nagturong iti EDSA People Power Monument.
Sitatalged a simmangpet dagiti nakipaset iti alas dos ti malem kalpasan ti pannagnada iti nasurok a tallopulo a minuto, nga awitda dagiti plakard ken bandera nga addaan iti panawagan a “Hold accountable all those involved” kadagiti isyu ti kurapsion.
Iti interview ti Bombo Radyo, kinuna ni Hannah Shiena Sodela, propesor iti St. Paul University Manila, a nakipaset isuna tapno allokoyen dagiti agtutubo nga agbalin a naridam ken lumaban para iti napudno a panangimaton.
Kabayatanna, impaganetget ti human rights lawyer a ni Maria Kristina Conti a ti korapsiyon ti kangrunaan a rason ti pannakipasetna, ken inallokoyna iti gobierno a denggen ti panawagan dagiti umili.
Kinuna met ni Zoe Caballero ti Center for Real Agrarian Reform a napateg ti natalna nga aramid tapno maipakita ti timek ken pigsa dagiti umili.
Kabayatanna, impadamag ni PMaj Hazel Asilo, spokesperson ti NCRPO, nga nagtalinaed a natalna ti sitwasyon idiay Quezon City.
Nasurok a 2,000 a pulis ti naidestino manipud iti EDSA Shrine agingga iti People Power Monument a nangsiguro ti seguridad dagiti dimmar-ay.
