ILI NORTE, SAN JUAN – Nagtungpal ti pammaltog iti timpuar a nabara nga argumento iti nagbaetan ti grupo ti biktima ken ti suspek kalpasan ti panagiinomda iti maysa nga establisimiento idiay Urbiztondo, San Juan, La Union.
Napasamak daytoy itay alas-tres ti parbangon iti national highway a sakupen ti Barangay Ili Norte, iti isu met laeng nga ili.
Nabigbig iti biktima a managan Ralph, agtawen ti 29, naasawaan, maysa a dietary staff, ken residente ti Barangay Bungol, Balaoan, La Union bayat nga iti suspek ket agtaltalinaed nga ‘unidentified’
Maibasar iti inisial nga imbestigasion ti San Juan Municipal Station, sakbay ti insidente, agarop alas-dyis ti rabii idi Abril 19, agiinom iti grupo ti biktima ken iti grupo ti suspek sadiay Tavern by the Sea.
Agarup ala-1:40 ti parbangon, Abril 20, pumanawda kuman iti lugar kalpasan ti panagiinomda, ngem kinompronta ida ti suspek a nagresulta ti nabara nga argumento. Kimmalma iti sitwasion idi nakiballaet iti girlfriend ti suspek, isu a naan-anay dan a pimmanaw ken nagturong iti amianan a direksion.
Nupay kasta, sinurot ida ti suspek babaen ti red Hyundai sedan nga addaan ti plate number IAA1225, ken idi nakadanondan iti nakapasamakan ti insidente, nakangngeg iti biktima ken ti grupona iti putok ti paltog.
Nagpasar iti biktima ti tama ti bala iti makinngato a paset ti takiagna, ken dagos a naiturong idiay Bacnotan District Hospital para iti medikal a pannakataming.
Kabayatanna, nagkiddaw met ti assistance ti San Juan MPS iti Scene of the Crime Operatives Regional Forensic Unit 1 (SOCO RFU1) kabayatan ti pannakaimbestigar ti insidente.###
