LA UNION – Sapsapulen ita dagiti otoridad ti maysa a drug pusher a naglibas iti pagbaludan ti police station idiay ili ti Bacnotan, La Union.
Naammuan ti Bombo Radyo manipud iti La Union Police Office, maipagarup a nagpammarang ti suspek a ni Julius Julieta ti Paagan, Bacnotan a makarikrikna daytoy iti nakaro a sakit iti tiyan ken linukatan ti maysa a non-uniform personel ti kwerpo iti pulisya ti pagbaludan tapno posasan daytoy ti pulis sakbay a maiturong iti ospital.
Ngem saan a namnamaen ti nasao a non-uniform personel nga iduran isuna ti suspek ken uray dagiti pulis nga aglipbas daytoy manipud ti pagbaludan.
Kabayatanna, mangnamnama dagiti pulis a matiliw ti pugante a ni Julieta tapno mapagsungbat iti inaramidna a panaglabsing ti linteg.
Ti nadakamat a suspek ket inaresto dagiti pulis gapu iti maipagarup a panaglako iti droga ti nasao nga ili.
