Matantan dagiti singasing a gakat a nasken a palpasen ti Senado apaman matuloy ti impeachment proceedings kadagiti kaso ni Vice President Sara Duterte.
Segun kenni Senator Sherwin Gatchalian, adu ti priority measures ti Kongreso a nasken nga unaen ken palpasen sakbay a malpas ti 19th Congress ken apaman makadanon ti Senado ti impeachment ti Bise Presidente ket adu a singasing a gakat ti matantan ti panag-aprubar da.
Sigurado kunana a dagiti prayoridad a gakat ket agbalin lattan a second priority ken awan ti maaramidan da nuketdi tutukan ti impeachment trial, mayat da man ken saan.
Agduadua met ni Senador Gatchalian nu umdas pay ti oras ti Senado agsipud ta arig na innem a bulan laengen ti nabatbati kadakuada sakbay eleksyon ken tallo a bulan pay ditoy ket panawen para ti kampanya.
Saan met a mabalin a manmano laeng a Senador ti agtugaw iti impeachment court gapo ta narikut ti proseso ken nasken nga amin da ket adalen iti daitoy nga trial.
Agbalin a dakkel a saritaan daitoy kadagiti senador a reelectionist agsipud ta nu isuda man ket agkandidato ket unaen da ti agkampanya ken ipasigurado a mangabak para iti sumaruno nga eleksyon.
