LA UNION – Kaiyarigan a baybay ita iti sumagmamano a lugar idiay Southern China gapwanan ti nalawa a panaglayos ken panagregga-ay ti daga a nakatayan ti nasurok 70 a tattao ken immakaran iti aganay 100,000 a residente.
Gapu daytoy iti sumagmamano itan a lawas a nakaru a panagtudo iti rehiyon sipud idi Hunyo 9 agdama a tawen.
Nag-isyu iti National Meteorological Center ti China ti rainstorm red alert, a maibilang a kangatuan a lebel ti nagsaruno nga aldaw idi Martes ken Miyerjoles a posible agpaut ita nga aldaw, Hunyo 27.
Kabilang dagiti lugar a makapad-padas ti nakaru a panaglayos ket idiay Sichuan Province, Southwest China; ili ti Chongqing idiay Hubei, Central China; Hunan Provinces; Anhui, Jiangxi ken Zhejiang Provinces idiay East China.
Idiay probinsiya ti Anhui, Jiangxi ken Hunan, dumanon ti 500 millimeters iti kangato ti danum ti layos idinto nga umabot met iti 740 millimeters idiay Changde City, Hunan Province ken Huangshan City idiay Anhui.
Kabayatanna, segun kadagiti siyentista, iti panagduprak ti kalamidad idiay China ket gapwanan ti climate change bayat nga ibagbaga ti kaadwan a delubyo iti mapas-pasaran da, gaputi saan a naingkalintegan a pannakibiang ti gobyerno ti China iti sidong ni Pres. Xi Jinping kadagiti kabaybayan a kukua ti babassit a pagilian iti ASEAN region.
Ngem iti likudan daytoy, adu ti nakisimpatiya ken nangi-kararag para iti kinatalged ti milyon a residente nga apektado ti nalawa a panaglayos idiay Southern China.
