LA UNION – Umaboten iti 117,676 dagiti pamilya a kumpirmado a naapektaran ti Southwest Monsoon ken Low Pressure Area (LPA) iti naduma-duma a paset ti pagilian.
Maibasar iti report nga inruar ti National Disaster Risk Reduction and Management Council (NDRRMC), kaibatugan daytoy ti 572,997 nga indibidwal.
Naggapo dagitoy iti 429 a barangay manipud MIMAROPA, Region 7, 9, 10, 11, 12, ken Bangsamoro Autonomous Region in Muslim Mindanao (BARMM).
Segun pay iti NDRRMC, 5,395 a pamilya wenno kaibatugan ti 22,253 a tattao ti agtaltalinaed iti evacuation center.
Adda pay iti 65,739 a pamilya wenno kaibatugan ti 327,001 nga indibiduwal nga apektado ngem pinili da iti saan nga agturong iti evacuation centers, ngem naipaayan latta dagitoy ti tulong.
Iti agdama, agtaltalinaed nga uppat iti kumpirmado a bilang dagiti natay.
Dagitoy ket manipud Region 9 ken Region 10, bayat nga agtultuloy a maber-beripika iti maipagarop a naipadamag a natay idiay Region 11 ken BARMM.
Nu makumpirma dagitoy, iti bilang dagiti natay ket pakabuklan a pito .
