Naipadeport tan ti aganay 187 Chinese national a naidetene gapo iti panaglabsing ti immigration law ken karaman pay kadagiti Philippine Offshore Gaming Operators gambling hubs.
Ineskortan dagiti otoridad dagiti Chinese nationals manipud detention facility ti Presidential Anti-Organized Crime Commission (PAOCC) agturong idiay Ninoy Aquino International Airport (NAIA) Terminal 1 para ti maysa a noon flight pa-Shanghai, China.
Daitoy nga addang ket paset latta iti direktiba ni Presidente Ferdinand Marcos Jr. sakbay iti deadline inton Enero 1, 2025 a total ban para kadagiti amin a POGO ditoy pagilian.
Dagiti detainee ket nakemmeg babaen ti sumagmamano a serye ti raids nga inyuswat dagiti otoridad iti umuna a paset ti tawen sadiay Lapu-Lapu City, Pasay city, Tarlac, ken Pampanga.
Kabayatanna, nakatuding met nga maipa-deport ti maikadua a batch dagiti gangganaet inton sumaruno a lawas.
Imbatad ni PAOCC Executive Director Gilberto Cruz a mangrugi Enero 1, sukimaten dan dagiti nabatbati pay a natatangken ti ulo na iti laksid ti nabilin a total ban para iti operasyon dagitoy.
Karaman ditoyen iti posible a pannakaipila kadakuada ti criminal case para iti panaglabsing ti Cybercrime Law.
Nagsapata met ti opisyal a mangipaay ti gobierno ti temporario nga assistance para kadagiti pamilya nga naibati dagiti deportee karaman kadagiti kangrunaan a kasapulan da kas iti medisina ken renta.
