LA UNION – Ngimmatu ti bilang dagiti nabakunaan itan a senior citizens ditoy probinsiya ti La Union.
Babaen iti bilin ni Gov. Francisco Emmanuel “Pacoy” R. Ortega III, a paspasan ti panagbakuna kadagiti nataengan tapno naparpartak met a magun-od iti herd immunity ditoy probinsiya, naisayangkat ti exclusive vaccination kadagiti A2 priority group iti SLC gym ditoy syudad ti San Fernando idi Agosto 7, 2021.
Kas resulta, umabot ti 314 a senior citizens iti immawat ti first dose kabayatan ti nasao a exclusive vaccination idi Sabado.
Iti bakuna a Pfizer ken Moderna iti naipaay a vaccines kadagiti senior citizens iti intero a probinsiya.
Nakitinnulong iti nasao a ganwat iti La Union Medical Society ken Philippine National Police, tapno agballigi iti nasao nga aktibidad.
Maibilang daytoy nga umuna nga exclusive vaccination kadagiti senior citizens a naisayangkat ditoy probinsiya.
Iti nasao a bilang, 218 iti nagparehistro bayat a dagiti 96 ket walk-in Senior Citizens.
Iti agdama, pakabuklan itan a 40,139 wenno kaibatugan ti 39.33% a nataengan ditoy probinsiya iti nakaawaten iti 1st dose ken 2nd dose a SCs, sipud August 7, 2021.
Kabayatanna, ditoy syudad ti San Fernando, inruar ti lokal a gobyerno iti updated vaccination schedule para ita nga aldaw, August 10, 2021.
Maitultuloy iti 1st dose vaccination para iti A1, A2, ken A3 priority group nga addaan ti naawat a confirmation text manipud City Vaccination Team.
Malaksid dayta, adda met iti maisayangkat a 2nd dose vaccination para kadagiti immunan a nakaawat ti 1st dose ti Sinovac, AztraZeneca, ken Pfizer, ngem kasapolan nga adda maawat dagitoy nga scheduled time slot sakbay da nga agturong iti vaccination site.
