LA UNION – Arestado iti maysa a 22-anyos a baro gaputi panagikot ti iligal a droga ken pagpabettak.
Iti suspek ket nabigbig iti nagan a Chester Luke Cachin Gallardo, residente ti Poblacion, Sablan, Benguet ngem tubo ti New Poblacion, Burgos, La Union.
Base iti report, natiliw ti suspek iti buy bust operation dagiti otoridad idiay Burgos, La Union idi Lunes.
Nakumpiskar kenkuana iti nasurok 25 a gramo ti mapapati a shabu, addaan ti drug value a nasurok P170,000, maysa a genuine P500 bill a nagserni kas buy bust money, 2 a pidaso ti P1000 bill kas boodle money, ken maysa a high explosive grenade MK2.
Dagiti nasao nga item a nakaikarga iti maysa a backpack ket nakita iti uneg ti kotse daytoy nga agmaris-dapo ken addaan ti plate number TKY 580.
Segun iti Burgos PNP, idi 17-anyos pay laeng ni Cachin ket mairam-ramanen iti kaso nga iligal a droga agingga ita nga agtawenen ti 22 ket isuna ti maatap nga agiwar-waras ti illegal drugs idiay ili ti Burgos.
Ni Cachin ket sumangsango iti kaso a panaglabsing iti Comprehensive Dangerous Drugs Act of 2002 (R.A. 9165) ken RA 9516 wenno Unlawful Possession, Manufacture, Dealing In, Acquisition Or Disposition Of Firearms, Ammunition Or Explosives.
