Mangisay-sayangkat ti imbestigasyon dagiti otoridad seknan iti napasamak a pannakatay iti national athlete a ni Mervin Guarte.
Ni Guarte ket pinatay ti suspek bayat a mat-maturog idiay Calapan City, Oriental Mindoro.
Iti 33-anyos a multi-medalist, a miyembro ti Philippine Air Force (PAF), ket mapapati nga inatakar ti saan a nabigbig a suspek bayat a mat-maturog iti balay ti gayyem na a maysa nga opisyal ti barangay.
Maysa a saan a nabigbig a suspek ti maipagarop a simrek iti nasao a balay, kasaruno ti panangbagsol na kenni Guarte iti barukong sakbay a naglibas, maibasar iti inisyal nga imbestigasyon ti Philippine National Police (PNP) MIMAROPA.
Dagus a kinondinar ni Oriental Mindoro Governor Humerlito Dolor iti pammapatay ken nagkari iti napartak nga hustisya.
Nangidanon ti simpatiya iti Philippine Sports Commission (PSC) iti kellaat a pannakatay ti SEA Games goldmedalist a ni Guarte.
Ni Guarte ket nangabak ti dua a gold medal iti 2019 Manila ken 2023 Cambodia SEA Games para iti obstacle racing.
Nakaiyawid pay ti dua a silver medal iti 2011 Indonesia SEA Games para iti athletics.
