LA UNION – Natay iti backride ti maysa a motorsiklo a nairaman iti napasamak nga aksidente idiay National Highway ti Barangay Taboc, San Juan, La Union agarup alas-7:50 idi rabii, June 28, 2021.
Nabigbig iti biktima a ni Ricardo Abad, 38-anyos bayat a ti nagmaneho ti motorsiklo ket ni Edwin Abat, agpada a residente ti nasao a barangay.
Base iti imbestigasyon ti San Juan Police, agturong iti abagatan a direksyon ni Abat idi maipagarup a napukawan ti kontrol iti panagmaneho ti motorsiklo idi gandatenna a lisyan ti sabali a behikulo a nagsikko iti kalsada agturong iti laud a direksyon.
Gapu iti daytoy, natumba ti motorsiklo iti tengnga ti kalsada kasaruno iti pannakadalapus ni Abad babaen ti agpa-amianan a kotse a manmanehuen ni Vincent John Subido, 18, residente ti Tagudin, Ilocos Sur.
Agpada a naiturong iti Ilocos Training and Regional Medical Center, San Fernando City, La Union dagiti dua a nagkalubbon iti motorsiklo tapno maagasan, ngem naideklara a dead on arrival ti backrider gapu iti nakaro a sinagabana a dunor iti naduma-duma a paset ti bagina.
Gumatang koma iti taraonda dagiti biktima, bayat nga agawiden idiay pagtaenganna ti respondent driver idi a napasamak ti aksidente.
