LA UNION – Siniguro ti National Disaster Risk Reduction and Management Council (NDRRMC) a naurnos ken nakasagana iti local ken regional operations dagiti local government units iti posible nga agbalin nga epekto ti bagyo Marce ditoy pagilian.
Naisayangkat ti panagtataripnong nga indaulwan ni Department of National Defense (DND) Secretary Gilberto Teodoro Jr. kas chairman ti NDRRMC kadwa na dagiti opisyal manipud Office of Civil Defense a pakaibilangan da Civil Defense Administrator Undersecretary Ariel Nepomuceno, Assistant Secretary Bernardo Rafaelito Alejandro IV ken Assistant Secretary Jekereen Joy Casipit tapno talantanen ti panagsagana dagiti LGU’s iti posible a panagduprak ti bagyo Marce.
Nainget ti ar-aramiden a monitoring dagiti nasao nga ahensya ken panagsagana para iti seguridad dagiti komunidad a mabalin a dalapusen ti bagyo Marce.
Dagus met a nagpatulod ti palagip ti NDRRMC iti amin a residente nga agtalinaed a vigilante ken itultuloy ti agdengngeg kadagiti abiso nga iruar dagiti lokal a gobyerno.
