LA UNION – Maminsan pay a sumango iti Quad Comm hearing ni sigud nga Iloilo Mayor Jed Patrick Mabilog iti sumaruno a panagdengngeg ti Quad Committee a nakatuding tentatively inton Biyernes.
Segun kenni Manila Representative Benny Abante, Chairman ti House Committee on Human Rights ken maysa a co-chair ti Quad Committee, maisentro iti extra judicial killings ken illegal drugs ti hearing.
Inwaragawag pay ni Abante a ni sigud a PNP Chief Police General Camilo Cascolan ti nangisalbar ti biag ni sigud nga Iloilo City Mayor Jed Mabilog agsipudta isuna ti nangibaga a saan nga agturong idiay Kampo Krame idi 2016.
Maipalagip nga iti testimonya ni Mabilog iti napalabas a Quad Comm hearing, imbaga na a namin-adu a daras a timmawag ken nag-text kenkuana ti maysa nga opisyal ti PNP.
Iti mensahe na kenni Mabilog, saan nga agturong ti Crame agsipudta ipa-raman da kenkuana idi da sigud a presidential candidate Mar Roxas ken sigud a Senator Franklin Drilon iti illegal drug trade malaksid pay nga agpeligro ti biag na.
Kinuna ni Abante, makatulong koma iti pammatalged ni Cascolan ngem natayen ti nasao nga opisyal idi napalabas a tawen.
Kabayatanna, nagkumpirma ni Davao City Representatitve Paolo Duterte a dumar-ay iti Quad Comm hearing tapno pagsalodsodan ti sumagmamano a resource persons agsipudta mairam-raman ti nagan ti ama na iti isyu ti extra judicial killings ken illegal drugs.
