BR LA UNION – Inwaragawag ti ICC-accredited lawyer a ni Atty. Joel Ruiz Butuyan iti maysa nga interview, a mabalin laeng a temporaryo a mawaya-wayaan ni sigud a presidente Rodrigo Roa Duterte nu asideg laeng idiay The Netherlands, iti pagilian a mangkupkop kenkuana.
Ti nasao a statement ket kasaruno iti kiddaw ti kampo ni Duterte a temporaryo a mawayawayaan agturong iti saan a nainaganan a pagilian a naipadamag nga immanamong a mang-sangaili kenkuana.
Kinuna ni Butuyan a ti pagilian a mabalin a mangawat kenni Duterte ket masapul a kameng ti ICC tapno matungpal dagiti pagannurotan ti korte.
Maipalagip a kinumpirma ti prosekusyon a saanda a kontra iti kadawatan ti kampo ti sigud a Presidente, matungpal laketdi dagiti kondisyon, karaman ti panangiparit kenni Duterte nga agusar iti internet wenno cellphone ken palubosanda laeng dagiti kameng ti pamilya a makisarita kenkuana.
Saan a maseknan ti abogado ti ICC iti panagbuteng iti posible a pannakawayawaya ni Duterte, a kunana a mangpataud laeng iti buteng kadagiti biktima ti extrajudicial killings iti sidong ti kampanya a ‘war on drugs’, ken mabalin met a mangapektar iti integridad ti International Court.
Inlibakna pay ti nagwaras a damag maipapan iti imbaga ti maysa a senador a maisubli ni Duterte ditoy Pilipinas, ket inawagna daytoy a “fake news.” Segun kenni Butuyan, saan a politikal ti kaso a sangsanguen ti sigud a presidente, no di ket gapu kadagiti nadagsen a krimen kontra iti sangkataoan.
