LA UNION – Mangisay-sayangkaten iti imbestigasyon iti Commission on Human Rights (CHR) iti napasamak a pammaltog a nakamatayan ni ex-Corporal Winston Ragos idi Martes, April 21 idiay Quezon City.
Iti eksklusibo nga interview ti Bombo Radyo La Union kenni CHR Spokesperson, Atty Jacqueline Ann de Guia, nangipeksa daytoy ti kinaliday ken pannaka-alarma iti napasamak nga insidente, agsipudta suldado a nagserbi iti Marawi siege iti biktima.
Makaalarma kunana agsipudta nadursok iti wagas a panangpaltog ni Police Master Sergeant Daniel Florendo Jr. iti namindua a daras iti fatal part ti bagi ni Ragos.
Kinuna na, adu iti salodsod da a kasapolan a masungbatan ken tarigagay da a maipaayan ti hustisya iti pannakatay ni Ragos a nagbalin a paset iti pakasaritaan ti pagilian, a nangparmek kadagiti terorista idiay Marawi.
Nagramot iti insidente idi maipagarop nga inungtan ni Ragos dagiti pulis iti quarantine checkpoint idiay Barangay Pasong Putik, Quezon City.
Ngem imbes a humanitarian approach iti ipakat dagiti otoridad ket nagbalin a military approach, segun pay laeng kenni Atty. de Guia.
Naamwan a na-discharge iti serbisyo ni Ragos gaputi sag-sagabaen na a post-traumatic stress disorder (PTSD) a mapapati a naala na iti nakaru a pannaka-trauma na iti rinnupak kadagiti terorista idiay Marawi idi 2017.
