BR LA UNION – Aprubadon iti panagngato ti suweldo dagiti kasambahay idiay Region 4-A wenno CALABARZON ket agbalin nga nga epektibo mangrugi inton Marso 7 agdama a tawen.
Inpakaammo daytoy ti Department of Labor and Employment (DOLE) kalpasan a nangipaulog ti Regional Tripartite Wages and Productivity Board IV-A (RTWPB IV-A) iti Wage Order, a mangimandar iti pannakaingato ti suweldo manipud P750 agingga iti P1,750 para kadagiti kasambahay iti rehiyon.
Iti wage order, ngumato ti suweldo dagiti kasambahay kadagiti siyudad ken first-class municipalities manipud P6,000 agingga iti P6,750 idinto a dagiti adda iti dadduma a munisipyo ket makaawat iti increase a P6,750 manipud P5,000.
Sakopen ti wage increase dagiti house helpers, yaya, kusinero, hardinero, laundry personnel ken dadduma pay a household staff, live-in man wenno saan.
Rumbeng nga umawat dagiti domestic workers iti binulan a suweldo nga awan ti kaltas wenno kissay malaksid no mandato ti linteg.
Inallokoy ti Department of Labor and Employment dagiti employer a tungpalenda ti baro a wage rate ken nagballag a dagiti aglabsing ket mabalin a sumango iti dusa iti sidong ti Domestic Workers Act.
