Ilunglungalong ni Senador Christopher “Bong” Go ti madagdagus a pannakaaprobar dagiti gakat a mainaig iti pannakapapigsa ti suporta ti barangay.
Dinakamat ti senador dagiti gakat para iti barangay nga inpilana kabayatan ti panagdar-ay na iti Barangay Captains Day sadiay Lingayen, Pangasinan.
Impaganetget ti senador ti kinapateg ti grassroots leadership iti panagdur-as ken panangipaay iti nasayaat a serbisio publiko kadagiti komunidad.
Gapu iti daytoy, impaganetget ni Go ti Senate Bill No. 197 wenno ti Magna Carta for Barangays a panggep iti mangbigbig ken mangipaay iti ad-adu pay a suporta kadagiti napateg nga akem dagiti opisyales ti barangay.
Adda pay ti Senate Bill 427 a mangimandar met ti pannakaited ti allowance, incentive, job security ken dadduma pay a benepisio kadagiti barangay health workers kasta met iti Senate Bill 2802 a panggep a pagbalinen a permanente ti termino dagiti opisial ti barangay ken Sangguniang Kabataan iti innem a tawen.
