Inlawlawag ni Senador Sherwin Gatchalian a saan a diskresion dagiti senador ken kongresista ti pannakausar ti Ayuda sa Kapos ang Kita Program (AKAP).
Inlawlawag ni Gatchalian, mabalin a mangi-refer ti siasinoman kadagiti lehislador iti AKAP ti Department of Social Welfare and Development wenno DSWD ngem masapul a siguraduenda a sumurot daytoy kadagiti guidelines.
Tapno makagun-od ti tulong manipud iti AKAP, masapul a nababbaba pay ti matgedan ngem dagiti minimum wage earners wenno saan a maawagan a direkta a nakurapay.
Kinunana, i-filter, sukimaten, ken awaten latta ti DSWD no karaman dagiti inrefer dagiti senador ken kongresista kadagiti benepisiario ti AKAP.
Innayon ni Gatchalian a daytoy ket executive budget ken ti ehekutibo ti mangipaulog kadagiti guidelines, rules ken disbursement ti budget ken saan a ti legislative.
