Inlawlawag ni Senador Sherwin Gatchalian nga adda ti dua a wagas tapno maisubli iti order of business ti Senado iti articles of impeachment kontra kenni Bise Presidente Sara Duterte.
Segun iti Senador, mabalin a mapasamak daytoy babaen ti botos ti lima a senador tapno maguyod manipud iti Senate archive iti impeachment complaint, wenno panagsuspendir dagiti rules babaen ti botos ti mayorya wenno 13 a senador.
Palawag pay ni Gatchalian, kasapulan laeng a mangipila ti mosyon tapno maisubli iti impeachment case iti plenaryo ken mapagbobotosan.
Maiyangkat iti panagamiris iti kaso no adda ti lima a pimmabor.
Nupay kasta, impaganetget ti senador a nakadependir latta daytoy iti agbalin a desisyon ti Korte Suprema.
Nadagsen iti waragawag ti Korte a void ab initio wenno awan bileg sipud na, isu ta arigna awan ti naawat nga impeachment complaint iti Senado. Ngem no ibaga ti Korte Suprema a saan daytoy a void ab initio, kayat na a satwen a valid iti panakaawat ti Senado iti impeachment ken mabalin a dumiretso iti impeachment trial.
Impagetget pay ni Gatchalian, saan a Senado iti pimmatay iti impeachment kontra iti Bise Presidente no di ket iti Korte Suprema a nagdesisyon ti void ab initio.
Maipalagip nga idi Miyerkules, dumanon ti nasurok innem nga oras iti nabara a debate iti plenaryo ti Senado tapno mapagdesisyonan iti impeachment case ni Duterte.
Nagbotos a pabor dagiti 19 a senador, maysa a nag-abstain, ken uppat iti kimontra nga iti kayat laeng ket itantan iti immuna a motion to dismiss nga impila ni Senador Rodante Marcoleta seknan ti impeachment case ti Bise Presidente.
Nagpannuray iti mosyon nga i-archieve wenno panangipaigid iti impeachment complaint iti archieve ti Senado, ken mabalin laeng a malukatan no maaddaan ti katulagan iti mayorya dagiti senador.
Kabayatanna, buklen da Senators Risa Hontiveros, Kiko Pangilinan, Bam Aquino, ken Tito Sotto dagiti uppat a senador a kimontra iti panag-archieve ti articles of impeachment, bayat a nag-abstain met ni Senador Ping Lacson.###
