Nagpanawagan ni House Senior Deputy Minority Leader ken Mamamayang Liberal (ML) Partylist Rep. Leila de Lima a papigsaen ken palawaen ti service contracting program para iti pampubliko a transportasyon tapno maikkan ti natalged a pamastrekan dagiti drivers ken mapangnamnamaan a serbisyo para kadagiti commuters iti kangitingitan ti agtultuloy a panangato ti presyo ti krudo.
Iti House Resolution No. 913 ti mammanday-linteg, inallukkoyna ti Department of Interior and Local Government (DILG), Department of Transportation, ken Land Transportation Franchising and Regulatory Board (LTFRB) nga adalen iti programa ken sungbatan dagiti pagkurkurangan iti implementayon, kasta met iti panangpasigurado ti nalawlawa a partisipasyon ti nadumaduma a sektor ti transportasyon.
Impaganetget ni De Lima nga iti dakkel a panagngato ti presio ti krudo, adon dagiti nagsardeng nga agpasada gapu ta abono to met laeng ti pagtungpalanda.
Dinakamat na met nga uray doblen iti ngimmatuan ti presyo ti diesel, sinuspende latta ti Presidente iti fare hike ken limitado laeng iti naawat nga ayuda dagiti drivers.
Iti sidong ti service contracting program, mabayadan dagiti drivers maibasar iti kilometro a tinarayda ken performance incentives–a mangipaay ti sigurado a matgedan uray bassit ti pasahero ken makatulong pay iti panagkissay iti demand ti krudo gapu ta mangallukoy daytoy iti panagusar ti pampubliko a transportasyon.
Nupay kasta, adda dagiti agtaltalinaed a karit kas iti panagkontra dagiti sumagmamano nga operator, isyu ti plete, ken limitasyon iti institusyon, isu nga impaganetget ni De Lima iti pagkasapulan ti komprehensibo a suporta iti polisiya.
Malaksid iti HR 913, nangipila met isuna ti HR 914 tapno imbestigaran iti kellaat a panagngato ti presyo ti diesel ken HR 915 tapno sukimaten iti epekto ti krudo kadagiti tsuper ken operators tapno makaipatungpal ti naikalintegan a fare increase.
Innayon na pay a rumbeng met nga ikonsidera ti gobierno iti suspensyon ti VAT iti produkto a petrolyo, rebisyon iti oil deregulation law, ken regular a subsidiya para kadagiti mannalon, mangngalap, PUV drivers, ken dadduma pay a nababa a sektor.###
