Nagprotesta dagiti deboto ken miembro ti Saint Michael the Archangel Parish Church idiay Bacnotan, La Union.
Kayat dagitoy a mapaikkat ti puwesto wenno agtalawen ti agdama a Parish priest da a ni Father Raul Panay.
Kiddaw ti maysa a miembro a ni Estaphanie Palomo, nasken nga agaramid ti bishop da iti aksyon agsipud ta dakkel iti respeto da kaniana ngem arig na saan da met isuda a patpatgan.
Innayon na pay a mapagkakatawaan itan ti Bacnotan Church gapo ta nagpaot ni Father Panay iti tallo a tawen, idinto nga immunan a napatalaw daitoy sadiay Santo Tomas ken saan pay a natawenan idiay Naguilian.
Agpada met iti rason da ti kadwa na a church worker a ni Elisa Espe, Presidente ti Parish Pastoral Council.
Segun ti opisyal, adun dagiti pannakababain ni Father Panay kenkuana. Adda pay iti gundaway a nilayatan ti padi isuna, ken napagsatwan pay iti dakes, karaman lang kadagiti dadduma pay a madi a galad ti parish priest kenkuana ken iti kakadua na.
Para met kenni Marcial Ronquillo, Vice President ti Parish Pastoral Council, adon dagiti naobserbaran da manipud nagtugaw ni Father Panay.
Kinunana ng awan iti transparency iti sidong ti padi nangruna kadagiti maipanggep ti kwarta ti simbaan; Adda pay ti proyekto a saan pay nalnalpas ket umaw-awat manen iti sabali ni Father Panay.
Kinunana nga awan ti serbi da nga opisyales nu saan da a maprotektaran ti Parokya.
Ti rason ti panangpaikkat da kenni Father Panay ket maipanggep iti kwarta ti simbaan, malaksid pay iti nauyong a panagsasao na ken nalaing a manangbabain.
Kabayatanna, apaman dumawat ti pammakawan ti parish priest ket mapakawan da latta isuna ngem saan da kayaten nga agtalinaed pay daitoy idiay Bacnotan.
